மருத்துவர் அய்யா கடலூர் மாவட்டத்தில் நுழையத் தடை: வன்னிய சாதிவெறியை எதிர்ப்போர் இதனை வரவேற்காதது ஏன்?

அனைத்து சமுதாயப் பேரியக்கம் - சமூக அமைதிக்கான ஒரு முன்முயற்சி

மருத்துவர் அய்யா அவர்கள் மாவட்டம் தோரும் நடத்திவரும் "அனைத்து சமுதாயப் பேரியக்கக் கூட்டம்" சமூக அமைதிக்கான ஒரு உன்னத இயக்கமாகும். 

பள்ளி, கல்லூரி செல்லும் பதின்வயது பெண்களைத் திட்டமிட்டு ஏமாற்றும் ஒரு அமைப்பினரின் சதிச்செயல்களை முறியடிக்கவும், சாதி ஒழிப்பு என்கிற பெயரில் பெண்களின் கல்வி உரிமையை பறிப்போருக்கு எதிராகவும், இளம்பெண்கள் மீதான வன்முறையை எதிர்த்தால் வன்கொடுமை தடுப்புச்சட்டம் ஏவப்படுவதை கண்டித்தும் இக்கூட்டம் நடத்தப்படுகிறது.

தருமபுரியில் கலவரம் நடந்த சூழலில், தமிழ்நாட்டில் இனி எங்குமே அத்தகைய நிகழ்வுகள் நடக்கக் கூடாது. காதல் நாடகம், கடத்தல், பணப்பறிப்பு, வன்கொடுமைச் சட்டம் முறைகேடாகப் பயன்படுத்தப்படுதல் - இதுபோன்ற செயல்களை சில அமைப்பினர் திட்டமிட்டு அரங்கேற்றும் நிலையில், கலவரத்துக்கு காரணமான இப்பிரச்சனைக்கு சனநாயக முறையில் பேச்சுவார்த்தை, அமைதிவழி போராட்டம் மூலம் தீர்வு காண வேண்டும் என்பதே அனைத்து சமுதாயப் பேரியக்கத்தின் நோக்கம் ஆகும்.

ஆனால், சனநாயகம் என்பதன் பொருள் புரியாத சர்வாதிகார கூட்டத்தினர் இதனால் "சமூக அமைதிக்கு பங்கம் விளையும்" என்கின்றனர். மதுரை மாவட்டத்திலும் கடலூர் மாவட்டத்திலும் நுழைவதற்கு பாமக நிறுவனர் மருத்துவர் இராமதாசு அய்யா அவர்களுக்கு தடைவிதிக்கப்பட்டுள்ளது. "பதட்டமான சூழ்நிலையினை கருத்திற்கொண்டும், சட்டம், ஒழுங்கு பிரச்சினைகள் ஏற்பட்டு பொதுமக்களின் அன்றாட வாழ்க்கைக்கு பாதிப்பு ஏற்படாமல் இருக்கும் பொருட்டும் தடைவிதிக்கப்படுவதாக" அந்தந்த மாவட்ட ஆட்சியர்கள் கூறியுள்ளனர்.

வன்னிய சாதிவெறியை எதிர்ப்போர் மௌனம் காப்பது ஏன்?

வன்னிய சாதிவெறி எதிர்ப்பு போராட்டங்களை முன்னின்று நடத்தியவர்கள், மருத்துவர் அய்யா அவர்கள் மீது கடும் நடவடிக்கை எடுக்க வேண்டும் என்று போராடியவர்கள் இந்தத் தடை குறித்து மௌனம் சாதிப்பது வியப்பளிக்கிறது.

வன்னிய சாதிவெறிக்கு எதிராக போராட்டம் நடத்தினீர்கள், உண்மை அறியும் அறிக்கைகளை வெளியிட்டீர்கள் - ஆனால், இப்போது அரசாங்கம் நடவடிக்கை எடுக்கும் போது எதற்காக மௌனம் சாதிக்கிறீர்கள்?

குறிப்பாக திமுக, இடதுசாரியினர், தமிழ்தேசிய வாதிகள், மனித உரிமை அமைப்புகள் அனைத்தும் மதுரை மாவட்டத்திலும் கடலூர் மாவட்டத்திலும் நுழைவதற்கு மருத்துவர் அய்யா அவர்களுக்கு விதிக்கப்பட்ட தடையை வரவேற்று அறிக்கை வெளியிடாதது ஏன்?

திராவிடக் கட்சிகளே, திராவிட அமைப்புகளே, தமிழ்தேசியர்களே, பொதுவுடைமை இயக்கங்களே, மனித உரிமைப் போராளிகளே - எல்லைகள் தெளிவாக வரையறுக்கப்பட்டுள்ளன. இந்தப் பக்கத்தில் நீங்கள் இல்லை. அந்தப்பக்கத்தில் நில்லுங்கள்.