சமச்சீர் கல்வி: முதல்வரை ஏமாற்றியது பத்திரிகைகளா? பார்ப்பனக் கூட்டமா?

தமிழக முதல்வரைத் தவிர மற்ற எல்லோரும் எதிர்பார்த்தபடி சமச்சீர் கல்விக்கு ஆதரவாக தீர்ப்பளித்துள்ளது உச்ச நீதிமன்றம். சில நாட்களுக்கு முன்பு தனியார் பள்ளியில் ஒன்றாம் வகுப்பு படிக்கும் எனது மகளை அழைக்க சென்றிருந்தேன். அங்கு பெற்றோர்கள் "அரசு பள்ளியிலும் தனியார் பள்ளியிலும் ஒரே பாடம்தான் என்றால் நாம் ஏன் அதிக பணம் கொடுத்து தனியார் பள்ளியில் சேர்க்க வேண்டும்?" என்று பேசிக்கொண்டனர். தனியார் கல்வி வியபாரிகளை பயமுறுத்தியது இந்த கேள்விதான்.

ஆனால், பார்ப்பனக்கூட்டத்தை அச்சுறுத்தும் கேள்வி வேறொன்று? எல்லோரும் ஒன்று என்று வந்துவிட்டால் - அப்புறம் பார்ப்பானுக்கும் சூத்திரனுக்கும் என்னதான் வேறு பாடு? இந்த மனப்புழுக்கத்தில் தான் - சோ, தினமணி, தினமலர், இன்னபிற பார்ப்பனக் கூட்டத்தினர் ஒன்று சேர்ந்து தமிழக முதலமைச்சரை நன்றாக ஏமாற்றியுள்ளனர் (அவரது மனவிருப்பம் என்ன என்பது அவருக்கே வெளிச்சம்).

நீதிமன்றம் முன்பே கூறியது என்ன?

கடந்த சூன் மாதம் 14 ஆம் தேதியே உச்சநீதிமன்றம் அளித்த உத்தரவில் மிகத்தெளிவாக "சமச்சீர் கல்வியை நடைமுறைப் படுத்துவது குறித்து" ஆராய குழு அமைக்க உத்தரவிட்டது.

இதுகுறித்து எனது முந்தைய பதிவில் பின்வருமாறு கூறியிருந்தேன்:


"சமச்சீர் கல்விக்கு முந்தைய பழைய புத்தகங்களை தமிழ்நாடு அரசு அச்சிட்டாலும் கூட அவற்றை இனி பயன்படுத்த முடியாது. உச்சநீதி மன்றம் அதற்கு முடிவு கட்டிவிட்டது.


அதாவது "பள்ளிகளில் சமச்சீர் கல்வியா? பழைய பாடத்திட்டமா?" என்ற கேள்விக்கு இனி வேலையே இல்லை. மாறாக "சமச்சீர் கல்விக்கு இப்போது அச்சடிக்கப்பட்ட புத்தகங்களா? அல்லது வேறு புதிய புத்தகங்களா? எதைப் பயன்படுத்தப் போகின்றனர்?" என்பதுதான் இப்போதுள்ள கேள்வி.


பழைய புத்தகங்கள் இனி வராது, அவற்றை பள்ளிகளில் நடத்தவோ, மாணவர்கள் படிக்கவோ வேண்டாம். பெற்றொர்கள் அவற்றை தேடிப்பிடித்து வாங்கவும் வேண்டாம் - என்கிற எளிதான உண்மையை தமிழக அரசோ தமிழ் பத்திரிகைகளோ இன்னமும் மக்களிடம் எடுத்துச் சொல்லி, பெற்றோரையும் மாணவர்களையும் குழப்பத்திலிருந்து விடுவிக்காமல் இருப்பது வியப்பளிக்கிறது" என்று குறிப்பிட்டிருந்தேன்.

(இங்கே காண்க: "பழைய பாடத்திட்டம்" இனி இல்லவே இல்லை - உண்மையை சொல்ல தமிழகஅரசு தயங்குவது ஏன்?)

ஆனால், தமிழ்நாடு அரசு இதற்கு நேர் எதிராக "சமச்சீர் கல்வி வேண்டுமா? வேண்டாமா?" என்று ஆராய - சமச்சீர் கல்விக்கு எதிரானக் கூட்டத்தினரைக் கொண்ட குழுவினை அமைத்தது.  இந்தக்கொடுமை போதாதென்று - 'இனி ஒருபோதும் பழைய பாடங்களுக்கு வேலை இல்லை' என உச்சநீதிமன்றமே உத்தரவிட்ட பின்னரும் - பலகோடி ரூபாய் மக்கள் பணத்தில் பழைய பாடபுத்தகங்களை அச்சடிப்பதையும் தொடர்ந்தது தமிழ்நாடு அரசு.

இப்போது - நீதிபதிகள் அளித்த தீர்ப்பில் சமச்சீர் கல்வித் திட்டம் தொடர்பான பெற்றோர்கள் மற்றும் மாணவர்களின் கோரிக்கையை நீதிமன்றம் ஏற்கிறது. மொத்தம் 25 காரணங்களை ஆராய்ந்து இந்த கோரிக்கைகளை நாங்கள் ஏற்கிறோம்.

தமிழகத்தில் நடப்புக் கல்வியாண்டிலேயே சமச்சீர் கல்வித் திட்டம் அமல்படுத்த வேண்டும் என்ற சென்னை உயர்நீதிமன்றத் தீர்ப்பில் தலையிட நாங்கள் விரும்பவில்லை.

சமச்சீர்கல்வித் திட்டத்தை இன்னும் 10 நாட்களில் அமல்படுத்துமாறு தமிழக அரசுக்கு உத்தரவிடுகிறோம் என்று நீதிபதிகள் தெரிவித்துள்ளனர்.

என்ன செய்வது - வாக்களித்த மக்கள் அனுபவிக்கத்தான் வேண்டும்!